Riaz Majeed
us ne ik din bhi na puchha bol aḳhir kis liye
tu mire hote dukhi hai mere sha.ir kis liye
saans lene par mujhe majbur karta hai ye kaun
kya bata.un ji raha huun kis ki ḳhatir kis liye
sochta huun kyuun bikhar jaati nahin har ek shai
vo nahin hai to murattab hain anasir kis liye
vo jo us ke dil men hai kyuun us ke honTon par nahin
kuchh nahin tu mujh se milta hai ba-zahir kis liye
kis ne har shai ko kiya vahm-o-guman men mubtala
ho gaya saaya mira mujh se hi munkir kis liye
kaun dekhega hamari ḳhun-amezi yahan
aa ga.e andhon men ham rangon ke tajir kis liye
ab raha hi kya hai mere jeb-o-daman men ‘riyaz’
aa raha hai mere pichhe vaqt-e-shatir kis liye
Leave a Reply