kinaron se juda hota nahin tughyaniyon ka dukh
na.i maujon men rahta hai purane paniyon ka dukh
kahin muddat hui us ko ganvaya tha magar ab tak
miri ankhon men hai un be-sar-o-samaniyon ka dukh
to kya tu bhi miri ujḌi hui basti se guzra hai
to kya tu ne bhi dekha hai miri viraniyon ka dukh
shikast-e-gham ke lamhon men jo gham-alud ho jaa.en
zamin hathon pe le leti hai un peshaniyon ka dukh
miyan-e-aks-o-a.ina abhi kuchh gard baaqi hai
abhi pahchan men aaya nahin hairaniyon ka dukh
main pahle DhunDhta huun ik zara asaniyan aur phir
baḌi mushkil men rakhta hai mujhe asaniyon ka dukh
Leave a Reply