shokhi ne teri lutf na rakkha hijab men
jalve ne tere aag lagai naqab men
vo qatra huun ki mauja-e-dariya men gum hua
vo saaya huun ki mahv hua aftab men
us saut-e-jan-navaz ka saani bana nahin
kya dhundte ho barbat-o-ud-o-rabab men
puchhi thi ham ne vajh-e-mulaqat-e-muddai
ik umr ho gai unhen fikr-e-javab men
ladti na jaae aankh jo saaqi se ‘shefta’
ham ko to khaak lutf na aae sharab men
Leave a Reply