Akele

Gulzar

kis qadar sidha, sahal, saaf hai rasta dekho

na kisi shakh ka saaya hai, na divar ki tek

na kisi aankh ki ahat, na kisi chehre ka shor

duur tak koi nahin, koi nahin, koi nahin

chand qadmon ke nishan haan kabhi milte hain kahin

saath chalte hain jo kuchh duur faqat chand qadam

aur phir tuut ke gir jaate hain ye kahte hue

apni tanhai liye aap chalo, tanha akele

saath aae jo yahan koi nahin, koi nahin

kis qadar sidha, sahal, saaf hai rasta dekho