sahra men ghaTa ka muntazir huun
phir us ki vafa ka muntazir huun
ik baar na jis ne muḌ ke dekha
us jan-e-saba ka muntazir huun
baiTha huun durun-e-ḳhana-e-gham
sailab-e-bala ka muntazir huun
jan-e-ab-e-baqa khoj men hai
main mauj-e-fana ka muntazir huun
khil ja.unga apne aap se main
tahsin-e-saba ka muntazir huun
is daur men ḳhvahish-e-tarab hai
madfan men hava ka muntazir huun
maazi ki saza bhugat raha huun
farda ki saza ka muntazir huun
shayad ki vahan mafar ho gham se
tasḳhir-e-ḳhala ka muntazir huun
hathon men hai mere daman-e-shab
suraj ki sada ka muntazir huun
barson se khaḌa huun haath uTha.e
tasir-e-dua ka muntazir huun
mera to ḳhuda kabhi nahin tha
main kis ke ḳhuda ka muntazir huun
kahte hain jise ‘nazar’ musafir
us abla-pa ka muntazir huun
Leave a Reply