jal gaya ḳhaak hua kab ka vo parvana-e-dil
ḳhatm hota nahin ab tak magar afsana-e-dil
hashr ke din pe uTha rakh ki baḌa sauda hai
alam-e-husn se mumkin nahin bai.ana-e-dil
aap ki ik nigah-e-naz use chhalka deti
qabil-e-sharbat-e-didar tha paimana-e-dil
ham jabhi samjhe the anjam ki jab fitrat ne
ḳhaak aur ḳhuun se tayyar kiya ḳhana-e-dil
jalne vaale se alag ho ga.e ham-mashrab-e-jan
de ke aag uTh ga.i vo sohbat-e-rindana-e-dil
tishna-e-jam-e-mohabbat se hamin vaqif hain
qadr kya un ko jo toḌa kiye paimana-e-dil
dohri zanjiron men jakḌa hai muqaddar ne mujhe
us ka divana hai dil aur main divana-e-dil
zabt karta huun magar Dar hai ki sham-e-gham men
kahin tang aa ke na khul jaa.e sulah-ḳhana-e-dil
ab to qatra nahin haan vo bhi kabhi din the ki ham
mast ho jaate the ḳhud dekh ke mai-ḳhana-e-dil
ja-e-ummid-o-tamanna ka pata milta hai
ab bhi dilkash hai mire vaste virana-e-dil
hai to miTTi ka magar qudarat-e-ḳhaliq bhi hai
husn vaale na bana len koi paimana-e-dil
dekh kar tafraqa-e-mehr-o-jafa ham samjhe
ek hi vaz.a ka banta nahin kashana-e-dil
ka.enat-e-do-jahan paas hai phir tang nahin
aur bhi kuchh ho to ḳhali hai abhi ḳhana-e-dil
ruḳh-e-rangin-e-hasin ek chaman hai lekin
raundne ke liye ho sabza-e-begana-e-dil
husn hai ḳhud hain zamana hai vo kyuun ghabra.en
aur yahan kya hai magar haan vahi virana-e-dil
miT ke tasvir-e-ḳharabat hai ab to varna
ka.aba kahte the sab aisa tha sanam-ḳhana-e-dil
kahiye qissa koi arbab-e-vafa ka ‘saqib’
chhoḌiye zikr jafa ka ki hai begana-e-dil
Leave a Reply