yaar ḳha.if hain mira dard baḌha dene se
aag itni hai ki bujh jaa.e hava dene se
jaise ham donon ke milne pe safar ḳhatm hua
manzilen banti hain raston ko mila dene se
vus.at-e-zat-e-makin se hai makan ki vus.at
dil baḌa hoga tujhe us men jagah dene se
barf pighli to nazar aane lage sabz pahaḌ
aankh khulne lagi ḳhvabon ko baha dene se
jaise qatre ne utara ho nadi ka sadqa
kitna halka hua dil us ko dua dene se
tere dam se miri nazren mire raste par hain
farq paḌta hai tujhe rah se haTa dene se
ye ri.ayat bhi koi peḌ hi kar sakta tha
rasta khul gaya ik shaḳh kaTa dene se
Leave a Reply