Jahan Sare Hawa Banne Ki Koshish Kar Rahe The

Abbas Qamar

jahan saare hava banne ki koshish kar rahe the

vahan bhi ham diya banne ki koshish kar rahe the

hamen zor-e-tasavvur bhi ganvana pad gaya ham

tasavvur men khuda banne ki koshish kar rahe the

zamin par aa gire jab asman se khvab mere

zamin ne puchha kya banne ki koshish kar rahe the

unhen ankhon ne bedardi se be-ghar kar diya hai

ye aansu qahqaha banne ki koshish kar rahe the

hamen dushvariyon men muskurane ki talab thi

ham ik tasvir sa banne ki koshish kar rahe the