miri hatheli men likkha hua dikhai de
vo shakhs mujh ko ba-rang-e-hina dikhai de
use jo dekhun to apna suragh paun main
isi ke naam men apna pata dikhai de
ravish pe jalen us ki ahaton se charagh
ajab khiram hai avaz-e-pa dikhai de
jo mehrban hai to kya mehrban khafa to khafa
kabhi kabhi to vo bilkul khuda dikhai de
saman saman hai dhundalka dhuan dhuan manzar
jidhar bhi dekhun bas ik khvab sa dikhai de
junun ne bakhsh diin nazron ko vusaten kya kya
ki zarre zarre men sahra bichha dikhai de
na meri tarah koi dekh le use ‘bilqis’
main kyuun bataun mujhe us men kya dikhai de
Leave a Reply