Saifuddin Saif
dar-parda jafaon ko agar jaan ga.e ham
tum ye na samajhna ki bura maan ga.e ham
ab aur hi aalam hai jahan ka dil-e-nadan
ab hosh men aa.e to miri jaan ga.e ham
palkon pe larazte hue taare se ye aansu
ai husn-e-pashiman tire qurban ga.e ham
ham aur tire husn-e-taghaful se bigaḌte
jab tu ne kaha maan ga.e maan ga.e ham
badla hai magar bhes gham-e-ishq ka tu ne
bas ai gham-e-dauran tujhe pahchan ga.e ham
hai ‘saif’ bas itna hi to afsana-e-hasti
aa.e the pareshan pareshan ga.e ham
Leave a Reply