mausam bhi yad-e-yar men dil-gir ho gaya
tanha.iyon se meri baghal-gir ho gaya
daman pe mere daagh lagane ki zid men vo
kirdar ki vo apne hi tash.hir ho gaya
bachchon ne mujh ko ghar se nikalne nahin diya
rishta ye mere paanv ki zanjir ho gaya
marne se us ko apne kabhi Dar nahin laga
jiina jab us ke vaste ta.azir ho gaya
allah ne rat-jagon ki dua.en qubul ki
vo ḳhvab mere ḳhvab ki ta.abir ho gaya
aansu men Dhal ke zer-e-lahad kho gaya kahin
ya dard ban ke dil se baghal-gir ho gaya
‘sima’ ulajh ga.i hai siyasat ke jaal men
dil ka mo.amla tha jo gambhir ho gaya
Leave a Reply