pairon ko mire dida-e-tar bandhe hue hai
zanjir ki surat mujhe ghar bandhe hue hai
har chehre men aata hai nazar ek hi chehra
lagta hai koi meri nazar bandhe hue hai
bichhadenge to mar jaenge ham donon bichhad kar
ik dor men ham ko yahi dar bandhe hue hai
parvaz ki taqat bhi nahin baaqi hai lekin
sayyad abhi tak mire par bandhe hue hai
ham hain ki kabhi zabt ka daman nahin chhoda
dil hai ki dhadakne pe kamar bandhe hue hai
ankhen to use ghar se nikalne nahin detin
aansu hai ki saman-e-safar bandhe hue hai
phenki na ‘munavar’ ne buzurgon ki nishani
dastar purani hai magar bandhe hue hai
Leave a Reply