Zafar Sahbai
be-hisi par hissiyat ki dastan likh dijiye
dhuup se ab barf par ab-e-ravan likh dijiye
katib-e-taqdir Thahre aap ko rokega kaun
jo bhi ankur sar uTha.e ra.egan likh dijiye
aap ki ankhon men chubh ja.egi varna raushni
ham charaghon ke muqaddar men dhuan likh dijiye
mushtahar ho ja.unga firqa-parasti ke liye
meri peshani pe aap urdu zaban likh dijiye
ham gharibon se ri.ayat ki zarurat hi nahin
sub.hen dozaḳh hain to shamon ko dhuan likh dijiye
aap to shayad qasam hi kha chuke taḳhrib ki
har jagah dharti pe ab atish-fishan likh dijiye
Leave a Reply