sama.at par dabav vaqt ka munh-zor hota hai
ḳhamoshi ke ta.aqub men hamesha shor hota hai
tumhara naam le kar khinchti huun aa.ine par ḳhat
jhapakti huun zara ankhen to chehra aur hota hai
mujhe kyon har zamana ḳhuun men lat-pat mila hai phir
baḌon se jab suna tha zulm ka ik daur hota hai
ḳhudara muftiyan-e-shahar se koi to ye puchhe
chura.e roTiyan bhuka agar to chor hota hai
hamare haan bichhaḌna bhi kabira nekiyon men hai
hamare haan musalsal ishq ab is taur hota hai
koi sachchi kahavat hai mohabbat vo laḌa.i hai
laḌe jo jitne ke shauq men kamzor hota hai
tabhi to ‘sa.adiya’ khul kar nahin milti kisi se main
bichhaḌna zehn men pahle hi zer-e-ghaur hota hai
Leave a Reply