Shahid Zaki
ab tiri yaad se vahshat nahin hoti mujh ko
zaḳhm khulte hain aziyyat nahin hoti mujh ko
ab koi aa.e chala jaa.e main ḳhush rahta huun
ab kisi shaḳhs ki aadat nahin hoti mujh ko
aisa badla huun tire shahr ka paani pi kar
jhuuT bolun to nadamat nahin hoti mujh ko
hai amanat men ḳhayanat so kisi ki ḳhatir
koi marta hai to hairat nahin hoti mujh ko
tu jo badle tiri tasvir badal jaati hai
rang bharne men suhulat nahin hoti mujh ko
aksar auqat main ta.abir bata deta huun
ba.az auqat ijazat nahin hoti mujh ko
itna masruf huun jiine ki havas men ‘shahid’
saans lene ki bhi fursat nahin hoti mujh ko
Leave a Reply