ye marhale bhi mohabbat ke baab men aa.e
ḳhulus chaha to patthar javab men aa.e
ḳhusha vo shauq ki dar dar liye phira mujh ko
zah-e-nasib ki tum intiḳhab men aa.e
hazar zabt karun laakh dil ko bahla.un
magar vo shakl jo har roz ḳhvab men aa.e
main kya kahun ki tira zikr ghair se sun kar
jo vasvase dil-e-ḳhana-ḳharab men aa.e
hai shahryar ki qurbat se fasla behtar
rahe jo qurb men akasr itaab men aa.e
vahin qabila-e-murda-zamir likh dena
hamara zikr jahan bhi kitab men aa.e
riya ke daur men sach bol to rahe ho magar
ye vasf hi na kahin ehtisab men aa.e
main apne des ki miTTi se pyaar karta huun
ye jurm bhi miri fard-e-hisab men aa.e
Leave a Reply