Ehsan Danish
jala hai haa.e kis jan-e-chaman ki sham-e-mahfil se
mahak phulon ki aati hai sharar-e-atish-e-dil se
ye daman-e-havadis se qayamat tak na gul hoga
charagh-e-dil mira raushan hai un ki sham-e-mahfil se
janab-e-ḳhizr ham ko ḳhaak raste par laga.enge
ki manzil be-ḳhudon ki hai muarra qaid-e-manzil se
Thahar bhi ai ḳhayal-e-hashr aur ik jaam piine de
sarakta hai abhi zulmat ka parda ḳhana-e-dil se
sahar ne le ke angḌa.i tilism-e-naz-shab toḌa
falak par husn ki sham.en uThin taron ki mahfil se
baḌha hai kaun ye girdab ki ḳhurak hone ko
ki uTTha shor-e-matam yak-ba-yak amboh-e-sahil se
miri balin se uTh kar rone vaalo ye bhi socha hai
chala huun kis ki mahfil men uTha huun kis ki mahfil se
hai us kambaḳht ko zid soz-e-batin se pighal ja.un
nigahon ne tumhari kah diya hai kya mire dil se
na daman-gir-e-dil ho na-ḳhuda phir koi nazzara
ḳhuda ke vaste kashti baḌha aghosh-e-sahil se
sipurd-e-be-ḳhudi kar de fara.ez aql-e-ḳhud-bin ke
haTa de is siyah-batin ka pahra ḳhana-e-dil se
har ik zarra hai dil ai jaane vaale dekh kar chalna
hazaron hastiyan lipTi paḌi hain ḳhak-e-manzil se
miri bebak nazren un ki janib uTh hi jaati hain
abhi ‘ehsan’ main vaqif nahin adab-e-mahfil se
Leave a Reply