Siddique Mujibi
dil hi girdab-e-tamanna hai yahin Dubte hain
apne hi gham men tire ḳhak-nashin Dubte hain
dil faqirana tha mahr o mah o anjum na bane
ḳhas ki manind rahe ham ki nahin Dubte hain
ham agar Duube to kya kaun se aaise ham the
shahr ke shahr jahan zer-e-zamin Dubte hain
apni ruposhi tah-e-ḳhak muqaddar hai to kya
Dubne ko to sitare bhi kahin Dubte hain
naḳhuda ho ki ḳhuda dekhte rah jaate hain
kashtiyan Dubti hain us ke makin Dubte hain
paar utarna hai to kya mauj-e-bala kam-e-nahang
dosto aao chalo pahle hamin Dubte hain
ishq vo bahr ‘mujibi’ hai ki dekha ham ne
ḳhar-o-ḳhas paar hue ahl-e-yaqin Dubte hain
Leave a Reply