gae mausam men jo khilte the gulabon ki tarah
dil pe utrenge vahi ḳhvab azabon ki tarah
raakh ke Dher pe ab raat basar karni hai
jal chuke hain mire ḳheme mire ḳhvabon ki tarah
saat-e-did ki aariz hain gulabi ab tak
avvalin lamhon ke gulnar hijabon ki tarah
vo samundar hai to phir ruuh ko shadab kare
tishnagi kyuun mujhe deta hai sarabon ki tarah
ghair-mumkin hai tire ghar ke gulabon ka shumar
mere riste hue zaḳhmon ke hisabon ki tarah
yaad to hongi vo baten tujhe ab bhi lekin
shelf men rakkhi hui band kitabon ki tarah
kaun jaane ki nae saal men tu kis ko padhe
tera meaar badalta hai nisabon ki tarah
shoḳh ho jaati hai ab bhi tiri ankhon ki chamak
gaahe gaahe tire dilchasp javabon ki tarah
hijr ki shab miri tanhai pe dastak degi
teri ḳhush-bu mire khoe hue ḳhvabon ki tarah