Sab Hamare Liye Zanjir Liye Phirte Hain

sab hamare liye zanjir liye phirte hain

ham sar-e-zulf-e-girah-gir liye phirte hain

kaun tha said-e-vafadar ki ab tak sayyad

bal-o-par us ke tire tiir liye phirte hain

tu jo aae to shab-e-tar nahin yaan har su

mishalen nala-e-shab-gir liye phirte hain

teri surat se kisi ki nahin milti surat

ham jahan men tiri tasvir liye phirte hain

moatakif garche ba-zahir huun tasavvur men magar

ku-ba-ku saath ye be-pir liye phirte hain

rang-e-khuban-e-jahan dekhte hi zard kiya

aap zor ankhon men iksir liye phirte hain

jo hai marta hai bhala kis ko adavat hogi

aap kyuun haath men shamshir liye phirte hain

sar-kashi shama ki lagti nahin gar un ko buri

log kyuun bazm men gul-gir liye phirte hain

ta gunahgari men ham ko koi matun na kare

haath men nama-e-taqdir liye phirte hain

qasr-e-tan ko yuun hi banva ye bagule ‘nasikh’

khuub hi naqsha-e-tamir liye phirte hain

Leave a Comment