ahmad-zafar

Kya Pata Kis Jurm Ki Kis Ko Saza Deta Hun Main

kya pata kis jurm ki kis ko saza deta huun main

rang sa ik bandhta huun phir bhula deta huun main

apne aage ab to main khud bhi thahar sakta nahin

samna hote hi chutki men uda deta huun main

moajiza agla to ab shayad purana ho chala

dekhna ab ke koi chakkar naya deta huun main

mujh se aage bhi nikal jaana bahut mushkil nahin

aj-kal ahista-rau huun rasta deta huun main

shor sa uthta hai aur uthte hi dab jaata hai ab

harf sa likhne se pahle hi mita deta huun main

taaki meri sulh-jui ko lage kuchh bhaav bhi

har nae fitne ko dar-parda hava deta huun main

baat bhi sunta nahin huun vasl men dil ki ‘zafar’

aise khar-maston ko mahfil se utha deta huun main

More Poems

Leave a Comment