jab bhi begam ki diid hoti hai
ek zahmat mazid hoti hai
muskurate hain aaj kyon murshid
koi laḌki murid hoti hai
yaad aate hain ham bhi salon ko
jab zarurat shadid hoti hai
chand suraj zamin se ugte hain
sha.iri jab jadid hoti hai
sach hi kahte hain ghar-janva.i ki
zindagi zar-ḳharid hoti hai
ab bacha.e ḳhuda balaon se
un se guft-o-shunid hoti hai
dosto zan-zada gharibon ki
kya kahun kaise iid hoti hai
laḌ ke milne se mil ke laḌne se
hasrat-e-dil mazid hoti hai
hai himaqat ‘rahim’ shadi bhi
is se miTTi palid hoti hai
Leave a Reply