sharh-e-jan-sozi-e-gham-e-arz-e-vafa kya karte
tum bhi ik jhuTi tasalli ke siva kya karte
shisha nazuk tha zara choT lagi TuuT gaya
hadse hote hi rahte hain gila kya karte
raat ne chheḌ diye bhule hue afsane
jaag kar sub.h na karte to bhala kya karte
apni kashti ko bhi mil jaata kinara shayad
tund thi mauj muḳhalif thi hava kya karte
jazba-e-shauq ko iz.har ki fursat na mili
lafz-o-ma.ani ka fusun TuuT gaya kya karte
dil ko vo dard mila jis ka mudava na ilaaj
mere monis mire gham-ḳhvar bhala kya karte
thi na kya kya havas-e-sair-o-tamasha ‘taban’
raste paanv ki zanjiren bana kya karte
Leave a Reply