mahrumiyon ka dil par itna hai kuchh asar sa
chahat ke naam se bhi lagne laga hai Dar sa
ik aah men Dhali hai rudad-e-zindagani
umr-e-tavil ka hai afsana muḳhtasar sa
ruḳhsat hua hai dil se har shauq rafta rafta
ye shahr-e-arzu bhi banta chala khanDar sa
aata hai dhyan un ka yuun dasht-e-zindagi men
zulmat men shab ki jaise ho jalva-e-sahar sa
asudgi-e-gham ne kitna surur baḳhsha
apne vajud se bhi rahta huun be-ḳhabar sa
andaz-e-pursish-e-gham tha dil-fareb kitna
vo dushman-e-tamanna lagta tha charagar sa
ashkon ne zabt-e-gham ki rakkhi hai laaj har dam
sau baar ghir ke aaya badal magar na barsa
rah-e-hayat men ham tanha nahin ‘mubarak’
un ka ḳhayal har dam rahta hai ham-safar sa
Leave a Reply