junun ke josh men insan rusva ho hi jaata hai
gareban phaḌne se faash parda ho hi jaata hai
mohabbat ḳhauf-e-rusva.i ka baa.is ban hi jaati hai
tariq-e-ishq men apnon se parda ho hi jaata hai
javani vasl ki lazzat pe raghib kar hi deti hai
tumhen is baat ka gham kyuun hai aisa ho hi jaata hai
bigaḌte kyuun ho aapas men shikayat kar hi lete hain
adu ka tazkira dushman ka charcha ho hi jaata hai
tumhari nargis-e-bimar achchha kar hi deti hai
jise tum dekh lete ho vo achchha ho hi jaata hai
akela pa ke un ko arz-e-matlab kar hi leta huun
na chahun to bhi iz.har-e-tamanna ho hi jaata hai
mira dava-e-ishq aghyar batil kar hi dete hain
jise jhuTa bana len yaar jhuTa ho hi jaata hai
butan-e-be-vafa ‘muztar’ dil-o-din kar hi lete hain
tumhin par kuchh nahin mauquf aisa ho hi jaata hai
Leave a Reply