mumkin nahin ki faiz-e-junun ra.egan rahe
ye bhi to ik nishan hai ki ham be-nishan rahe
aajiz tiri talash men kaun-o-makan rahe
ab jo tujhe talash kare vo kahan rahe
be-vasta nazara-e-shan-e-jamal kar
ye bhi hai ik ḳhata ki nazar darmiyan rahe
taufiq de ki pesh karun gham ko is tarah
duniya ko mere gham pe ḳhushi ka guman rahe
shaam un ki ik ada hai sahar un ka ek nuur
ya.ani ki vo ayaan na hue aur ayaan rahe
baḳhsha hai mujh ko un ki nazar ne zahe karam
vo hosh jis pe be-ḳhabari ka guman rahe
shauq-e-suḳhan fuzul hai ‘shahid’ baghair-e-ishq
dil men koi ḳhalish ho to munh men zaban rahe
Leave a Reply