Subh-E-Nau Lati Hai Har Sham Tumhein Kya Malum

Faiz Ul Hasan Khayal

sub.h-e-nau laati hai har shaam tumhen kya ma.alum

zaḳhm ḳhushiyon ke hain paigham tumhen kya ma.alum

bhuul kar bhi jo kisi bazm men aaya na gaya

sainkaḌon us pe hain ilzam tumhen kya ma.alum

log gulshan men to chalte hain sar-afrazi se

un men kitne hain tah-e-dam tumhen kya ma.alum

kuchh andhere bhi ḳhatavar-e-tabahi hain magar

raushni par bhi hai ilzam tumhen kya ma.alum

jis ko tum DhunDte ho sham-e-ruḳh-e-naz liye

vo to arse se hai gumnam tumhen kya ma.alum

jo ruḳh-e-zist pe tha harf-e-ghalat ki manind

mil raha hai use in.aam tumhen kya ma.alum

jo kafan bandh ke chalte hain vafa ki rah men

zindagi kar chuke nilam tumhen kya ma.alum

surḳh-ru kaun hua kucha-e-janan men kabhi

namvar bhi hue badnam tumhen kya ma.alum

do qadam bhi na chale rah-e-vafa men ham log

hai abhi zauq-e-talab ḳhaam tumhen kya ma.alum

jo jala raat ki tanha.i men us par bhi ‘ḳhayal’

bevafa.i ka hai ilzam tumhen kya ma.alum