samajh ke zulm karo ai buto khuda bhi hai
tumhare jaur-o-jafa ki kuchh intiha bhi hai
agar main jaunga puchhunga ye masiha se
ki mere dard-e-jigar ki koi dava bhi hai
kabhi raha mire lab tak kabhi vahan pahuncha
ye naala mera rasa aur na-rasa bhi hai
fasana qais ka logon se sun liya hoga
ye mera qissa-e-gham aap ne suna bhi hai
musafiran-e-adam aae do-ghadi ke liye
sara-e-dahr men aa kar koi raha bhi hai
tamasha dekhiye vo baad-e-qatl bhuul gaya
ki mere dar pe koi kushta-e-ada bhi hai
jafa-o-jaur se un ke to ho gaya aajiz
buton ke ishq ka is dil men hausla bhi hai
samajh ke khar-e-mughilan to sar utha apna
ki rahravon men ik ashiq barhana-pa bhi hai
safina bahr-e-musibat se paar kar dega
khuda samajhte ho jis ko vo nakhuda bhi hai
uthao shauq se manzil men tum qadam apne
ki rahzan jo hai is men vo rahnuma bhi hai
nazar se shaikh ki chhup kar chala huun piine ko
‘jamila’ abr hai barish hai aur hava bhi hai
Leave a Reply