bikhere zulf ruḳh par kaun ye bala-e-bam aaya
ḳhayalon ki faza mahki baharon ka payam aaya
mizaj-e-yar men jab bhi ḳhayal-e-intiqam aaya
sar-e-fihrist apna hi gunahgaron men naam aaya
ajab hangama dekha ham ne saaqi teri mahfil men
koi tishna-dahan uTTha koi chhalka ke jaam aaya
giran-koshi men afrazi tan-asani men pamali
mashaqqat suraḳh-ru uTThi tasahul zer-e-dam aaya
zuhur-e-sair-chashmi hi dalil-e-kamrani hai
mira pindar-e-na-asudgi hi mere kaam aaya
ye misra de diya iqbal ka kis shoḳh-fitrat ne
samand fikr ke aage ‘ziya’ mushkil maqam aaya
Leave a Reply