hijr men ankhen aansu ban kar bah jaati hain socha na.iin
vo bhi us din ghusse men tha aur main ne bhi roka na.iin
kitna mushkil hai ye kahna main tera ho sakta na.iin
phir bhi main tujh ko ye dukh to de sakta huun dhoka na.iin
ek jagah par Thahri ankhen gahri sochen ḳhamoshi
kab tak ḳhud pe zulm karoge is ko vapas aana na.iin
is se bichhaḌ kar soch raha huun us ko bhulane ki tarkib
log sharab piya karte hain main cigarette tak piita na.iin
shikve mujh ko bhi hote hain mera dil bhi dukhta hai
apne andar ghuT jaata huun meri jaan main kahta na.iin
kis darja nuqsan uThaya hai ham ishq faqiron ne
jitna tujh ko kho baiThe hain utna tujh ko paaya na.iin
ye pariyon se chehre jin par jaan chhiḌakte hain ham log
mujh ko in peḌon ke niche dhuup mili hai saaya na.iin
kitni ummiden hoti hain un ko ik haan sunne ki
lekin aksar puchhne valon ke hisse men aaya na.iin
Leave a Reply