Qaisar Siddiqi
ghar se main jab bhi akela nikla
mujh se pahle mira saaya nikla
phaaḌ kar daman-e-sahra nikla
mere andar se jo dariya nikla
ik tabassum jo mila tha mujh ko
vo bhi ik zaḳhm-e-tamanna nikla
jis pe kal sang-e-malamat barse
aaj vo daar pe iisa nikla
aa.ina dekha jo uryan ho kar
jism hi jism ka parda nikla
jis ne ye bhiiḌ laga rakkhi thi
ḳhud vo us bhiiḌ men tanha nikla
chehra ijad hai a.ine ki
aa.ina nikla to chehra nikla
aaj ik ḳhat ko jo khola ‘qaisar’
us men suraj ka sarapa nikla
Leave a Reply