dayar-e-zat men jab ḳhamushi mahsus hoti hai
to har avaz jaise gunjti mahsus hoti hai
main thoḌi der bhi ankhon ko apni band kar luun to
andheron men mujhe ik raushni mahsus hoti hai
suna tha main ne ye to pattharon ka shahr hai lekin
yahan to pattharon men zindagi mahsus hoti hai
tasavvur men tiri tasvir main jab bhi banata huun
mujhe har baar rangon ki kami mahsus hoti hai
jise sochon ne Dhala ho ḳhayalon ne tarasha ho
vo chehra dekh kar kitni ḳhushi mahsus hoti hai
yahi bedariyan hain jo mujhe sone nahin detin
inhin bedariyon men niind bhi mahsus hoti hai
ye ab main agahi ki kaun si manzil pe aa pahuncha
mujhe sairabiyon men tishnagi mahsus hoti hai
Leave a Reply