Poet
main kaha ek ada kar to laga kahne ”un-hun”
dekh Tuk aankh chura kar to laga kahne ”un-hun”
sab se hansta tha vo kal, ro ke jo main bol uTha
ham se bhi Tuk tu hansa kar to laga kahne ”un-hun”
main kaha dil ko main le ja.un to bola vo ki ”hun”
le chala jab main uTha kar to laga kahne ”un-hun”
main kaha sabr o dil o diin ne vafa ham se na ki
be-vafa tu to vafa kar to laga kahne ”un-hun”
main kaha jam-e-mai piite ho to bola vo ki ”hun”
jab kaha la.un chhupa kar to laga kahne ”un-hun”
main kaha sohbat-e-aghyar bari hai pyare
un se itna na mila kar to laga kahne ”un-hun”
main kaha ishq ko iz.har karun bola ”hun”
jab kaha kahta huun ja kar to laga kahne ”un-hun”
main kaha samjhe hai azar mira bola ”hun”
jab kaha kuchh to dava kar to laga kahne ”un-hun”
main kaha ab tiri duuri se hai ‘jur.at’ be-tab
kuchh to kah paas bala kar to laga kahne ”un-hun”
Leave a Reply