Azhar Adeeb
raushni hasb-e-zarurat bhi nahin mangte ham
raat se itni suhulat bhi nahin mangte ham
dushman-e-shahr ko aage nahin baḌhne dete
aur koi tamgha-e-jur.at bhi nahin mangte ham
sang ko shisha banane ka hunar jante hain
aur is kaam ki ujrat bhi nahin mangte ham
kisi divar ke saa.e men Thahar lene de
dhuup se itni ri.ayat bhi nahin mangte ham
saari dastaron pe dhabbe hain lahu ke ‘az.har’
aise kuufe men to izzat bhi nahin mangte ham
Leave a Reply