Dar-E-Kaenat Jo Wa Kare Usi Aagahi Ki Talash Hai

dar-e-kā.enāt jo vā kare usī āgahī kī talāsh hai

mujhe raushnī kī talāsh thī mujhe raushnī kī talāsh hai

ġham-e-zindagī ke fishār meñ tirī aarzū ke ġhubār meñ

isī be-hisī ke hisār meñ mujhe zindagī kī talāsh hai

ye jo sarsarī sī nashāt hai ye to chand lamhoñ kī baat hai

mirī ruuh tak jo utar sake mujhe us ḳhushī kī talāsh hai

ye jo aag sī hai dabī dabī nahīñ dosto mire kaam kī

vo jo ek aan meñ phūñk de usī sho.alagī kī talāsh hai

ye jo sāḳhta se haiñ qahqahe mire dil ko lagte haiñ bojh se

vo jo apne aap meñ mast ho mujhe us hañsī kī talāsh hai

ye jo mel-jol kī baat hai ye jo majlisī sī hayāt hai

mujhe is se koī ġharaz nahīñ mujhe dostī kī talāsh hai

Leave a Comment