Amjad Islam Amjad
dar-e-ka.enat jo va kare usi agahi ki talash hai
mujhe raushni ki talash thi mujhe raushni ki talash hai
gham-e-zindagi ke fishar men tiri aarzu ke ghubar men
isi be-hisi ke hisar men mujhe zindagi ki talash hai
ye jo sarsari si nashat hai ye to chand lamhon ki baat hai
miri ruuh tak jo utar sake mujhe us ḳhushi ki talash hai
ye jo aag si hai dabi dabi nahin dosto mire kaam ki
vo jo ek aan men phunk de usi sho.alagi ki talash hai
ye jo saḳhta se hain qahqahe mire dil ko lagte hain bojh se
vo jo apne aap men mast ho mujhe us hansi ki talash hai
ye jo mel-jol ki baat hai ye jo majlisi si hayat hai
mujhe is se koi gharaz nahin mujhe dosti ki talash hai
Leave a Reply