tere kuche men ja ke bhuul ga.e
ḳhud ko ham yaad aa ke bhuul ga.e
zaḳhm ḳhandan hain aaj bhi mere
aap to muskura ke bhuul ga.e
bahs go nasehon ne achchhi ki
mudda.a saTpaTa ke bhuul ga.e
jo bhula.e na bhulte the sitam
samne un ko pa ke bhuul ga.e
kaun the kya the ham kahan ke the
jaane kis ko bata ke bhuul ga.e
ham to ḳhair un ko bhulte the kahan
va.ade lekin vafa ke bhuul ga.e
aise bhi kya alaav bujhte hain
dil ko samjha-bujha ke bhuul ga.e
haa.e ankhen to ham bhi rakhte the
haa.e ham to mila ke bhuul ga.e
bhuul jaata hai aadmi lekin
aap nazdik la ke bhuul ga.e
ishq ‘rahil’ usi ko kahte hain
ranj uTha.e uTha ke bhuul ga.e
Leave a Reply