Khumar Mirzada
ik rang sa chhalka tha magar baas na aa.i
vo mauj-e-guzishta bhi koi ḳhaas na aa.i
is baat pe hujjat hain chahakte hue qarye
har shaḳhs ko jangal ki faza raas na aa.i
ḳhuun ho ke agarche dil-e-sad-chak bhi Tapka
hathon men va-lekin rag-e-ehsas na aa.i
tab ranj khule dhuup ganva dene ke ham par
in sim-zada kunjon men jab ghaas na aa.i
paani bhi alag chhan ke rakkha tha lahu se
lekin kisi paira.e men ik pyaas na aa.i
sau baar charaghon ko munDeron pe dhara hai
ankhon ke jharokon men koi aas na aa.i
ai bad-e-saba mauj-e-pareshan na hua kar
tu duur kahan thi ki mire paas na aa.i
Leave a Reply