sone hamen kab deti hai avaz kisi ki
ḳhvabon men bhi dar aa.i hai avaz kisi ki
jab duur jaziron pe koi ja base apna
lahron pe safar karti hai avaz kisi ki
uThte hain qadam jab bhi kisi dasht ki janib
qadmon ko jakaḌ leti hai avaz kisi ki
ye log tamasha.i hain bas giit sunenge
kya un ko jo bhar aa.i hai avaz kisi ki
ankhon men palaT aati hai tasvir para.i
mere liye bina.i hai avaz kisi ki
sadiyon se yahan baiThe hain ham gosh-bar-avaz
ab tak to nahin aa.i hai avaz kisi ki
Leave a Reply