hua na mujh se koi ham-kalam gardish men
dhuan hue hain mire sub.h-o-sham gardish men
ḳhayal-o-ḳhvab hua har zamana-e-vahshat
utar chuke hain sabhi ḳhush-ḳhiram gardish men
main bhagta huun sar-e-dasht-e-karbala aur phir
izafa karte hain aa kar imaam gardish men
miri talab miri raftar ke munafi hai
main ḳhaas shaḳhs huun rahta huun aam gardish men
panap raha hai kahin dil men shauq-e-did-o-shunid
dhaḌak rahe hain zamane mudam gardish men
badal badal ke ka.i haath hashr uThata hai
bana raha hai koi rah-e-jam gardish men
ḳhuda ka shukr ada karta huun main sub.h-o-masa
labon pe rakh ke darud-o-salam gardish men
badalta rahta hai chalne se mai-kade ka nizam
ki chal-chalav se rahta hai jaam gardish men
rah-e-fana pe qadam rakh ke phans na ja.un kahin
laga rakha hai ḳhuda.i ne daam gardish men
ruka hua huun main ik gardishi jazire par
guzar rahe hain mire sub.h-o-sham gardish men
ruke hue hain sabhi dost kyon ‘fida’ mire
milega un ko yaqinan davam gardish men
Leave a Reply