hamare ḳhvab hamari pasand hote ga.e
ham apne a.ina-ḳhanon men band hote ga.e
ye kya hua ki ba-in-jism us se milte rahe
magar firaq ke sadme do-chand hote ga.e
har ek fat.h pe maghrur ho raha tha vo
har ik shikast pe ham ḳhud-pasand hote ga.e
ham aise bikhre ki apne hi kaam na aa sake
kisi ke haq men magar sud-mand hote ga.e
kisi ki bala-qadi ke shikoh ki zid men
ham apne qad se ziyada buland hote ga.e
Leave a Reply