dil par vafa ka bojh uThate rahe hain ham
apna har imtiyaz miTate rahe hain ham
munh par jo ye jale hue daman ki raakh hai
sho.alon men zindagi ke nahate rahe hain ham
itna na khul saka ki hava kis taraf ki hai
saare jahan ki ḳhaak uḌate rahe hain ham
ankhon se dil tak ek jahan-e-sukut hai
sunte hain is dayar se jaate rahe hain ham
tera ḳhayal mane-e-arz-e-hunar hua
kis kis tarah se ji ko jalate rahe hain ham
kis ki sada suni thi ki chup lag ga.i ‘shahab’
saton suron ka bhed ganvate rahe hain ham
Leave a Reply