sub.h-dam kaise mile mahfil men parvane ki ḳhaak
surma-e-chashm-e-vafa keshan hai divane ki ḳhaak
joshish-e-avargi-e-shauq-e-majnun munfa.il
shahid-e-sahra-navardi meri virane ki ḳhaak
chupke chupke sham.a sozan raat bhar roti rahi
rakh ke apne samne mahfil men parvane ki ḳhaak
kya koi phir qais ashufta chala hai su-e-dasht
kis ko uTh kar dekhti hai roz virane ki ḳhaak
roz laati thi saba mahfil men bu-e-zulf-e-yar
is dafa aa.i hai le kar un ke kashane ki ḳhaak
dekhna hi chahte hain nasha zahid to phir
mai-gusaron se kaho mal len vo maiḳhane ki ḳhaak
shaiḳh sahab kya hai fatva aap ka is baab men
qabil-e-sajda hai pasha ko sanam-ḳhane ki ḳhaak
Leave a Reply