Jatinder Vir Yakhmi Jayaveer
hai vahi tishnagi saqiya phir mujhe
jaam se peshtar kuchh pila phir mujhe
kis tarah dosto mai-kashi chhoḌ duun
jaam o mahfil se hai vasta phir mujhe
chandni raat men dil pareshan hai
chand tu yaad kyuun aa gaya phir mujhe
gar munasib nahin mujh ko manzil mile
hai safar lazmi kyuun ḳhuda phir mujhe
jis gali men mire dil ke TukḌe hue
dil vahin khinch kar le chala phir mujhe
haan koi bhi hunar ḳhaas mujh men nahin
kyuun zamana raha DhunDhta phir mujhe
saath tum ho mire haath men jaam hai
hai gham-e-zindagi ḳhvah-maḳhvah phir mujhe
Leave a Reply