najma-shaheen-khosa

Zamin Mile Kahin Hamein Kahin To Aasman Mile

zamin mile kahin hamen kahin to asman mile

dukhon ki dhuup men shajar koi to mehrban mile

tire firaq men jiye tire firaq men mare

chalo ye khvab hi sahi visal ka guman mile

alam ki shaam aa gai lo mere naam aa gai

charagh le ke raah men ai kaash mehrban mile

abhi talak fughan huun main misal-e-dastan huun main

mile to ek pal kabhi kahin to karvan mile

ajiib se vo rang the sabhi ke haath sang the

hamen to ghair bhi sabhi misal-e-dostan mile

jabin jabin nahin rahi to mah-jabin nahin rahi

na log vo kahin mile na tujh ko astan mile

More Poems

Leave a Comment