Mujh Tak Nigah Aai Jo Wapas palaT Gai

Poet

mujh tak nigah aa.i jo vapas palaT ga.i

phaila jo mera shahr to pahchan ghaT ga.i

main chup raha to aankh se aansu ubal paḌe

jab bolne laga miri avaz phaT ga.i

is ka nahin hai ranj ki taqsim ghar hua

phulon bhari jo bel thi angan men kaT ga.i

jiine ki ḳhvahishon ne sabhi zaḳhm bhar diye

a.ankhon se ashk mez se tasvir haT ga.i

dast-e-bahar-e-rang ne ḳhushbu bikheri thi

phir apne aap phuul se titli lipaT ga.i

manzar jo chahta huun vahi dekhta huun main

main kya karunga ‘shaz’ jo ye dhund chhaT ga.i