Nakhshab Jaarchawi
ḳhayal-o-ḳhvab ki duniya men la ke dekh liya
tiri qasam tujhe tujh se chhupa ke dekh liya
jo ban paḌe to zara mere ban ke bhi dekho
ki tum ne mujh ko to apna bana ke dekh liya
kisi tarah bhi vo dil se juda nahin hote
hazar tarah se un ko bhula ke dekh liya
abhi na aa.e the achchhi tarah se hosh men ham
kisi ne naaz se phir muskura ke dekh liya
jo inqalab na dekha tha ham ne ai ‘naḳhshab’
vo us nigah ko apna bana ke dekh liya
Leave a Reply