Poet
mujh se puchhe hain vo ki kya hai dil
kya kahun ḳhana-e-ḳhuda hai dil
kya kahun kya buri bala hai dil
us ki zulfon se ja gutha hai dil
teri furqat men ai but-e-dam-baz
ho ke ankhon se ḳhuun baha hai dil
mil ke us se hua mira dushman
dekh kya saḳht bevafa hai dil
jab se ashiq hua huun us ka main
rat-din sirf mudda.a hai dil
unsur-e-ḳhak sard dil ye garm
kaun si ḳhaak se bana hai dil
ai muhavvis jo yaar ke dar par
ḳhaak ho.e to kimiya hai dil
gham-e-hijran men ho ke qatra-e-ḳhun
nok-e-mizhgan pe aa raha hai dil
siine men ik khaTak si hai bas aur
ham nahin jante ki kya hai dil
yaad men us ke tir-e-mizhgan ke
hadaf-e-navak-e-bala hai dil
tujh se koi bhala mile kyuun kar
tera har harf ḳhud juda hai dil
qadr-e-dil ‘aish’ koi kya jaane
maḳhzan-e-raz-e-kibriya hai dil
Leave a Reply