ek muddat se use ham ne juda rakkha hai
ye alag baat hai yadon men basa rakkha hai
hai ḳhala charon taraf us ke to ham kyuun na kahen
kis ne is dharti ko kandhon pe uTha rakkha hai
jo sada saath rahe aur dikha.i bhi na de
naam us ka to zamane ne ḳhuda rakkha hai
mire chehre pe ujala hai to hairan kyuun hai
ham ne sapne men bhi ek chand chhupa rakkha hai
jo talab chandni raton men bhaTakti hi rahi
ab use dhuup ki chadar men sula rakkha hai
Leave a Reply