raushni tak raushni ka rasta kah lijiye
raat ko sham-o-sahar ka fasla kah lijiye
de ga.i kitni baharen ek fasl-e-arzu
rang-o-bu ko mausamon ka ḳhun-baha kah lijiye
gunjti hai umr-e-viran men tamanna ki thakan
harf-e-gham ko gumbad-e-jan ki sada kah lijiye
kund aḳhir kar ga.iin talvar ko ḳhun-reziyan
dosti ko dushmani ki intiha kah lijiye
bal-o-par khulte nahin jin ke nasheman ki taraf
un uḌanon ko havaon ki ghiza kah lijiye
mausam-e-gul dekhiye khulte darichon ke tale
bam-o-dar ko shahr ki ab-o-hava kah lijiye
kuchh nahin milta ‘samad’ patthar ko teshe ke siva
azari ko azari nam-e-ḳhuda kah lijiye
Leave a Reply