Sajid Hameed
zahr men Duubi hui surḳh hikayat men gum
dil girafta hai hava mauja-e-asvat men gum
munkashif hota hua lamha-e-mazi ka nishan
aankh jhapki thi hua dud-e-ḳharabat men gum
shaam ki sa.at-e-avval men falak par ja kar
ham ne dekha hai samundar ko ḳhayalat men gum
unghti raat ke mathe pe chamakti bindiya
dekh kar ho ga.i nadiya bhi savalat men gum
vo jo ik lamha-e-hairan tha subuk-rau tanha
ho gaya hai tiri ankhon ke tilismat men gum
muskurata pas-e-tasvir tha sha.ista saman
jaane kyuun ho gaya nadida mahakat men gum
vo qarina jise sadiyon ne kiya hai paida
phir na ho jaa.e kahin shorish-e-jazbat men gum
Dhal gaya kaise larazte hue taron men hamid
jo tha aansu miri palkon pe mudarat men gum
Leave a Reply